පාකිස්තානු ආයතනයකින් මෙරටට ආනයනය කරන ලද බාස්මතී මෙට්‍රික් ටොන් 125 ක් වෙනුවෙන් ගෙවිය යුතු රුපියල් දෙකෝටි 74 ලක්ෂයකට අධික මුදලක් නොගෙවා පැහැර හැරිය බව කියන මෙරට සහල් ආනයනය කිරීමේ ආයතන දෙකක් සම්බන්ධයෙන් විමර්ශනයක් ආරම්භ කර ඇති බව කොළඹ වංචාව විමර්ශන අංශය කොළඹ අතිරේක මහේස්ත්‍රාත් ළහිරු ද සිල්වා මහතා වෙත ඊයේ (17) දැන්වීය.

කොළඹ  පිහිටි ඒ.එම්.පී හෝල්ඩින් ආයතනය හා අබිසාන් එන්ටර්ප්‍රයිසස් නැමති ආයතන දෙක සම්බන්ධයෙන් එසේ විමර්ශනයක් ආරම්භ කර ඇති බව විමර්ශන නිලධාරීන් අධිකරණයට දැන්වීය.

පකිස්තානු සමාගමක් කොළඹ වංචාව විමර්ශන අංශය වෙත කරන ලද පැමිණිල්ලක් අනුව සිද්ධිය සම්බන්ධයෙන් එසේ විමර්ශන ආරම්භ කර ඇති බවද එම නිලධාරින් අධිකරණය හමුවේ පැවසීය.

ශ්‍රී ලංකා වාණිජ දෙපාර්තමේන්තුව මගින් 2024 වසරේ ජනවාරි මාසයේදී පල කරන දැන්වීමක් අනුව පැමිණිලිකාර සමාගම එම ආයතන දෙක හඳුනාගෙන ශ්‍රී ලංකා වාණිජ දෙපාර්තමේන්තුවේ අනුමැතිය ඇතිව මෙරටට බාස්මතී සහල් ගෙන්වීමත් සඳහා එම ආයතන දෙක සමඟ ගිවිසුමක් අත්සන් කරගෙන ඇති බවට පැමිණිල්ල මගින් පෙන්වාදී ඇති බවද එම නිලධාරීන් අධිකරණයට දැන්වීය.

ඒ අනුව දින 30 ක් ඇතුළත මුදල් ගෙවීමේ පදනම මත සැකකාර ආයතන දෙක මගින් පැමිණිලිකාර පකිස්තානු ආයතනයෙන් රුපියල් 27,412,500 ක වටිනා සහල් මෙට්‍රික් ටොන් 125 වෙන් වෙන් වශයෙන් එම ආයතන දෙක ගෙන්වාගෙන ඇති බව පැමිණිල්⁣ල මගින් පෙන්වා දී ඇති බවද විමර්ශන නිලධාරීන් පැවසූහ. 

ඉකුත් වසරේ මැයි මස තුළදී එම සහල් සැකකාර සමාගම් දෙක මගින් මෙරටට ආනයනය කර ඇති නමුත් ඊට අදාල ගෙවීම් මෙතෙක් නොගෙවා පැහැර හැර ඇති බවට සිද්ධිය සම්බන්ධයෙන් සිදුකළ මූලික විමර්ශනවලදී කරුණු අනාවරණය වන බවද  එම විමර්ශන අංශය අධිකරණයට දැන්වීය.

විමර්ශන නිලධාරීන් අධිකරණයට දැක්වූ කරුණු සලකා බැලූ මහේස්ත්‍රාත්වරයා සිද්ධිය සම්බන්ධයෙන් විමර්ශනයක් පවත්වා එහි ප්‍රගතිය අධිකරණයට වාර්තා කරන ලෙස විමර්ශන නිලධාරීන්ට නියෝග කළේය.