තායි-කසාවත ගත පියාසර සිත: තායිලන්තයේ තාවකාලික පැවිදි අත්දැකීමෙන් උපන් අභ්යන්තර ආධ්යාත්මික චාරිකාව
ප්රශ්නය: 'තායි-කසාවත ගත පියාසර සිත' කෘතිය රචනා කිරීමට ඔබට පදනම් වූ පසුබිම කෙටියෙන් පැහැදිලි කළ හැකිද?
පිළිතුර: තායිලන්තයේ පවතින සුවිශේෂී සංස්කෘතික හා ආගමික සිරිතක් වන්නේ තරුණ හෝ මැදිවියේ පසුවන ගිහියන් යම් නියමිත කාලපරිච්ඡේදයකට තාවකාලිකව පැවිදි බිමට ඇතුළත් වීමයි. මා ලැබූ ඒ තාවකාලික පැවිදි ජීවිතයේ අත්දැකීම මෙම කෘතියට මූලිකම පදනම වුණා. බාහිර ලෝකයේ සියලු බැඳීම් සහ වේගවත් නාගරික ජීවිතයෙන් මොහොතකට මිදී, තායිලන්තයේ විහාරස්ථානයක සිවුරක් දරාගෙන ගත කළ ඒ නිහඬ, ගැඹුරු ආධ්යාත්මික චාරිකාව මගේ සිත තුළ ඇති කළ නොමැකෙන කම්පනය සහ අත්දැකීම්
සමුදාය අක්ෂරවලට නැගීමේ අභිලාෂය මෙහි ආරම්භයයි.
ආධ්යාත්මික පරිවර්තනය සහ අත්හැරීමේ මොහොත මා කෘතියේදී පද්යයට නැගුවේ මෙලෙසින්:
"හැඩපලු කොණ්ඩය
වත පුරා පැතිරුණ ගණ රැවුල
ගණ දෙබැම
මුඩු කොට දමා
තනි පොට සිවුර පොරවා
සංසාටිය උරහිසට පළඳින විට
හිත අතීතයට...
මමංකාරයෙන් උමතුව
දිවා රෑ සැරි සැරූ හැටි.."
ප්රශ්නය: ඓතිහාසික හා සංස්කෘතිකමය වශයෙන් ශ්රී ලංකාව සහ තායිලන්තය අතර පවතින සබඳතාව මෙම කෘතිය හරහා ස්පර්ශ වන්නේ කෙසේද?
පිළිතුර: අනාදිමත් කාලයක සිට ශ්රී ලංකාව සහ තායිලන්තය (පැරණි සියම) අතර පවතින්නේ නොබිඳෙන ආගමික හා සංස්කෘතික සහසම්බන්ධතාවයක්. විශේෂයෙන්ම ලංකාවේ උපසම්පදාව අහිමි වී ගිය අඳුරු යුගයක, වැලිවිට ශ්රී සරණංකර සංඝරාජ හිමියන්ගේ මූලිකත්වයෙන් කීර්ති ශ්රී රාජසිංහ රජු සමයේ සියමෙන් (තායිලන්තයෙන්) උපාලි මහා තෙරුන් වහන්සේ ප්රමුඛ සංඝයා වහන්සේලා වැඩම කරවා 'සියමෝපාලි මහා නිකාය' පිහිටුවීම අපේ ඉතිහාසයේ රන් අකුරින් ලියැවුණු සංගිඳියාවක්. මෙම කෘතිය පුරාම ඒ ඓතිහාසික ආගමික බැඳීමේ සෙවනැල්ල මෙන්ම, වර්තමාන තායි බෞද්ධ සංස්කෘතිය සහ ශ්රී ලාංකේය බෞද්ධ උරුමය අතර ඇති අද්විතීය සාම්යතාවන් හඳුනා ගැනීමට මට ලැබුණු අවස්ථාව අන්තර්ගත වෙනවා.
තායිලන්තයේ පූජනීය පරිසරය තුළ පැවිදි බිමෙහි ලබන සන්සුන් බව සහ
භාවනානුයෝගී සිතුවිලි හයිකු ආකෘතියේ කෙටි පද්යයන්ගෙන් පවා නිරූපණය කිරීමට මා උත්සාහ කළා:
"සරා සඳ එළිය
නකොන්පතොම් මැද
සිත භාවනාවක..."
ප්රශ්නය: 'කසාවතකින් ගත දැවටුවද සිත සැ රිසරන ආකාරය' යන්නෙන් ඔබ අදහස් කළේ කුමක්ද?
පිළිතුර: කසාවතක් හෙවත් සිවුරක් දැරූ පමණින් සිත එකඟ කරගැනීම හෝ සියලු කෙලෙසුන්ගෙන් මිදීම පහසු නැහැ. ශරීරය කසාවතින් පෙරවී මහණදම් පුරද්දී පවා, මිනිස් සිත අතීතකාමී මතකයන්, අනාගත බලාපොරොත්තු, රාග-දෝෂ-මෝහමය සිතුවිලි සහ ලෞකික බැඳීම් ඔස්සේ ඈත අතීතයට හෝ අනාගතයට පියාසර කරනවා. සිවුර තුළ සිටින
යතිවරයා තමන්ගේම පියාසර කරන සිත දෙස උපේක්ෂාවෙන් සහ සිහිනුවණින් (සතියෙන්) බලන්නේ කෙසේද, ඒ සිත යටපත් කරගෙන අභ්යන්තර සාමය සොයාගන්නේ කෙසේද යන්නයි මෙම කෘතියෙන් ගැඹුරින්ම විමසා බලන්නේ.
විශේෂයෙන්ම පැවිදි වූවද ගිහි ජීවිතයේ මානුෂීය බැඳීම් සහ පීතෘ ස්නේහය සිත තුළ මතුවන අයුරු මා මෙම පද්ය නිර්මාණයෙන් නිරූපණය කළා:
"නේක විධ අරුමෝසම් රසකැවිල්ලක්
පාත්තරයට වැටු විගස
සිහිවෙයි ගෙදර
සුදු දෝණිගේ සුදු පුතාගේ මුහුණ
බෑගයේ දමාගෙන ගෙන එන්න හිතෙනවා
වැඩ ගිහින් එනකොට වගේම
ඒත් මං ඇවිත් ඉන්නේ
වැඩට නෙවෙය්යි... වැඩට පිණිස වැඩට..."
ප්රශ්නය: මෙම කෘතිය සහ එහි ඇති
'කාවිසරණය' (කාව්යමය හා සාහිත්යමය ප්රවේශය) හරහා ඔබ පාඨකයා වෙත තිළිණ කිරීමට බලාපොරොත්තු වන්නේ කුමක්ද?
පිළිතුර: මෙය හුදෙක් සටහන් පොතක් හෝ සංචාරක තොරතුරු එකතුවක් නෙමෙයි. මගේ අරමුණ වුණේ කාව්යමය මෙන්ම ගැඹුරු භාෂා රටාවක් (කාවිසරණයක්) භාවිත කරමින් පාඨකයාද මා ලැබූ ආධ්යාත්මික අත්දැකීම වෙත කැඳවාගෙන යාමයි. නූතන යන්ත්රණීය ලෝකයේ අතරමං වී සිටින මිනිසාට ස්වකීය සිත දෙස ආපසු හැරී බැලීමටත්, බාහිර සැප සම්පත්වලට වඩා අභ්යන්තර සන්සුන්කම වටිනා බව වටහා දීමටත් මෙහි ඇති සංවේදී ප්රකාශනය උපකාරී වේ යැයි මා විශ්වාස කරනවා.
එම අධ්යාත්මික සන්සුන් බව සහ දෘශ්යමය රූපණය කාව්යමය ප්රවේශයකින් දැක්වෙන තවත් අවස්ථාවක් මෙසේ සඳහන් කළ හැකියි:
"පැමිණියේ නිවැරදිම
ගමනදැයි සංකාවක
කෙලෙස් බිඳුවක් කරයි හිරිහැර
"වටටප් සිලින්" විහාරයේ
හිමි දෙනුවන
ආලෝකයේ රැස් දහර
හිරිහැරයට හිරිහැර
කරන අපූරුව..*
ප්රශ්නය: අවසාන වශයෙන්, මෙම කෘතිය පාඨකයා අතට පත්වීම පිළිබඳව ඔබේ අදහස කුමක්ද?
පිළිතුර: 'තායි-කසාවත ගත පියාසර සිත' කියන්නේ මගේ ජීවිතයේ අතිශය සංවේදී සහ පූජනීය පරිච්ඡේදයක එකතුවක්. බෞද්ධ දර්ශනයේ අගය, සංස්කෘතික හුවමාරුව සහ මානව සිතේ සංකීර්ණ බව පිළිබඳව අලුත් කෝණයකින් සිතන්නට පෙළඹෙන ඕනෑම පාඨකයෙකුට මෙම කෘතිය අලුත් ආධ්යාත්මික ආලෝකයක් සපයාවි.
ග්රන්ථකරණයට අමතරව ඔබගේ සෙසු නිර්මාණකාරයන් පිළිබඳිබඳව කතා කරනවනම්?
ඔව් ඇත්තටම මම පූරකවරයෙක් ලෙසින්, නිර්මාණ කුසලතා සංවර්ධන සහ Relaxation abd soft skills Developmant වැඩසටහන් සම්පත් දායකයකු ලෙස, ගීත රචකයෙකු ලෙස,දරුවන් සඳහා story teller කෙනෙකු ලෙසින්, තිර රචකයෙකු ලෙස, ජන ගී ගායන ශිල්පියෙකු ලෙසින් වාගේම ගීත රස වින්දන වැඩසටහන් සම්පත් දායකයෙකු ලෙසින් මගේ දායකත්වය ලබා දෙනවා
ඔබේ ඉදිරි නිර්මාණ පිළිබඳ කතා කරමු
ලඟදීම ළමා ගීත පොතක් සහ ගීත සංගත තැටියක් දැක්වීමට කටයුතු කරගෙන ය? යනවා. ඒ වගේම එක්තරා අත්පිටපත් තරගයකින් ජයග්රහණය ලද මගේ "නේත්රාවතී' නවකතාව ජනගත
කිරීමටත් ,
මගේ ගීත රචනා එකතුවත් එළිදැක්වීමටත්,ගීත කිහිපයක් ප්රාසාංගිකව ඉදිරිපත්කිරීමටත් බලාපොරොත්තු වෙනවා... ඒ වගේම තායිලන්තයේ පැවැත්වෙන "folklore" ප්රසංගයක් සඳහා මගේ කණ්ඩායම සමඟින් ශ්රී ලංකාව නියෝජනය කිරීමටත් සූදානමින් ඉන්නවා
උපුල් ගුරුගේ විසින් රචිත තායි කසාවත ගත පියාසර සිත භාශා ද්විත්වයකින් එළිදැක්වේ.
